Tag Archives: COVID-19

CureVac txertoaren saiakuntza klinikoari buruzko informazioa Biodonostian

CureVacek jakinarazi digu saiakuntzan aztertzen ari diren txertoaren eraginkortasuna ez dela nahikoa izan, tarteko analisietan, Sendagaien Europako Agentziak (EMAk) onartzeko.

Parte-hartzaileei informazio guztia helarazteko, Osasun Sailaren komunikatu hau bidali diegu (sakatu hemen), eta pertsonalki deitu diegu zalantzak argitzeko.

Dagoeneko harremanetan jarri gara gure zentroan parte-hartzaile izan diren guztiekin eta hala nahi duten guztiei, Osakidetzak txerto komertzial bat hartzeko dei egiten ari zaie, baldin eta txertaketa-kanpaina irekita badago adin-talde horrentzat.

Eskerrak eman nahi dizkiegu parte-hartzaile guztiei euren eskuzabaltasunagatik, ahaleginagatik eta gertutasunagatik. Entsegu honetan izan duten parte hartzea oso baliagarria izango da COVID-19aren aurkako txerto hau eta beste batzuk garatzeko.

Egunotan kudeatzen ari garen deien kopurua kontuan hartuta, gomendatzen dugu, behar izanez gero, curevac@biodonostia.org helbidean kontaktatzea.

Biodonostiak Covid aurkako Curevac entseguaren lehen asteen balantzea egin du

Ensegua egiten ari den taldeko kide batzuk

Parte hartzeko onartutako boluntarioen zitazioak aurreikusitako erritmoan egiten ari dira.

Joan den otsailaren 2an itxi zen boluntarioen erreklutamendua, herritarrek erantzun bikaina eman baitzioten Biodonostia OIIak Curevac farmazialari alemaniarrak garatu eta sustatutako SARS-CoV-2ren aurkako txertoaren entseguan parte hartzeko egindako deiari. Entsegu honetan txertoaren eraginkortasuna eta segurtasuna frogatzea espero da.

Guztira 1.500 lagunek eman dute izena, eta horietatik 1.200 irizpideak betetzen zituzten. Arduradunek, hala ere, deialdiak jasotako erantzuna arrakastatsutzat jo dute, eta gipuzkoarrek, bereziki, eta euskal herritarrek, oro har, emandako erantzuna eskertu dute.

Otsailaren 5ean hasiera formala eman zitzaion entseguari, eta horri zentroaren irekiera esaten zaio, hau da, sustatzailearen visita jaso zuen Biodonostiak, prozesuaren hasierari oniritzia emateko .

Horrela, astelehenean, otsailak 8, dena prest egon zen lehen boluntarioak hartzen hasteko, eta protokoloan ezarritako probak egin ondoren, txertoaren edo plazeboaren lehen dosiak jaso zituzten. Aste honetan zehar 140 paziente daude inokulatuta eta esan beharra dago prozesua normaltasun osoz garatu dela; bigarren astean 200 inguru gehiago izango dira, eta laugarren astean 750. Hortik aurrera, horiei guztiei bigarren dosia emango zaie, eta, aldi berean, 250 boluntario gehiago zitatu nahi dira, lehen dosia hartzeko.

Aipatzekoa da boluntarioen artean Gipuzkoako eskualde guztietako pertsonak daudela. %60a 50 urtetik gorakoak izango dira, eta %40a 18 eta 50 urte artekoak. Sexuen arabera, emakume boluntario gehiago egon dira.

Bestalde, euren borondatez parte hartzen duten osasun-langileak 8 mediku koordinatzaile, 22 mediku eta 40 erizain dira, eta arratsaldero 4 mediku eta 4 erizaineko taldeetan txandakatzen dira txertoa inokulatzeko, gehi 2 erizain gehiago, erauzketak egiten. Profesional horiek Gipuzkoako ESI guztietako unitate ezberdinetakoak dira.

Koronabirusaren aurkako curevac-en txertoaren eraginkortasuna eta segurtasuna egiaztatzeko nazioarteko azterketa batean hartuko du parte Euskadik

Osakidetzaren Biodonostia eta Biocruces Bizkaia Ikerketa Sanitarioko Institutuak aukeratu dituzte Alemaniako Curevac enpresa farmazeutikoak garatu eta sustatu duen SARS-CoV-2aren aurkako txertoaren eraginkortasuna eta segurtasuna egiaztatuko duen saiakuntza klinikoan parte hartzeko. Euskal Autonomia Erkidegoak, beraz, estatuan aukeratu dituzten hiru zentroetako bi eskainiko ditu (hirugarrena, Madrilgo Erkidegoarena da). Garrantzi handiko saiakuntza klinikoa da. Mundu osoan 30.000 lagun baino gehiagok hartuko dute parte; horietako 2.000 inguru Euskal Autonomia Erkidegoak ipini ditzake.

CureVac Alemaniako enpresa biofarmazeutiko bat da. Enpresa horrek immunitate-sistema estimulatzen duen RNA mezulariaren mekanismoan —gaur egun banatzen ari diren Pfizer-en eta Moderna-ren bi txertoek erabiltzen duten bera— oinarritutako txerto bat garatu du. Hala ere, Curevacen txertoak jada merkaturatutako txertoak erabiltzeko topatzen dituzten oztopoetako bat gainditzen du; izan ere, Curevacen txertoa mantentzeko eta prestatzeko baldintzek bere banaketarako logistika errazten dute. Gainera, Europan produzitzen denez, gure esparruko herrialdeetan dosi gehien banatzeko konpromisoa hartu duen txertoetako bat da.

Euskal Autonomia Erkidegoak nazioarteko saiakuntza kliniko honetan parte hartzeak osasun-sistemaren —osasun-sistema asistentziala zein ikerketakoa— ahalmena eta Eusko Jaurlaritzaren Osasun Sailak esparru biosanitarioan egindako apustua erakusten du. Eta hori guztia aurrera eraman ahal izan da Osakidetzako Zerbitzu Erakundean, BIOEFan eta Ikerketa Sanitarioko Institutuan diharduten pertsonen lanari esker. Institutu horiek saiakuntza klinikoen esparruan duten esperientzia funtsezkoa izan da euren aukeraketan.

Azterketa hori, gainera, pandemia hau hasi zenetik Euskal Osasun Sistema garatzen ari den ikerketa-jarduerari gehitu zaio, eta COVID-19ari aurre egiteko —beharrezkoa maila globalean krisia kontrolatzeko— txerto berri bat garatzen laguntzeko aukera bikaina da.

Parte-hartzea

18 urtetik gorako eta azterketaren protokoloan adierazitako irizpideak betetzen dituzten Euskal Autonomia Erkidegoko pertsona guztiek saiakera horretan parte hartu ahal izango dute hala nahi badute. Saiakuntza kliniko honetan parte hartuko duten boluntarioak modu aleatorioan banatuko dituzte, batzuk, txertoa jasoko duten taldean eta, besteak, plazeboa —hau da, inolako ondoriorik ez duen konposatu bat (gatz-serum)— jasoko duten taldean. Ez pazienteak, ez datuak biltzeaz eta jarraipena egiteaz arduratzen diren profesionalek ez dute jakingo subjektu bakoitza zein taldetan dagoen. Horrela, azterketaren bidez bildutako datuen kalitatea eta zorroztasuna bermatzen da. Entsegu honetan txertoaren bi dosi jarriko dira 28 eguneko tartearekin. Parte-hartzaileei urtebetez luza daitekeen jarraipena egingo diete, bisita medikoen eta telefono deien bidez. Gainera, informazioaren erregistroa erraztuko duen mugikorrerako aplikazio batean sartu ahal izango dira. Parte-hartzaileek, nahi dutenean, azterketatik irtetea eskatu ahal izango dute. Halaber, txertoa edo plazeboa jaso zuten ere jakin ahal izango dute. Hiru eta sei hilabeteko epean bitarteko analisiak egingo dituzte. Emaitzen arabera, txertoaren erabilera onartzeko prozesua azkartu daiteke, jada merkatuan dauden txerto batzuen kasuan gertatu den bezala.

Datozen egunetan, beharrezko dokumentazio eta errekerimendu guztiak prest daudenean, Biodonostia eta Biocruces Bizkaia Institutuek parte-hartzaileak biltzeko prozesuak jarriko dituzte martxan. Prozesu horien berri bere garaian emango da.

Lotutako albisteak

Julio Arrizabalaga, Biodonostia OIIaren Zuzendari Zientífikoari egindako elkarrizketa SER-Hoy por Hoy SanSebastián saioan.

ETBren Egun on Euskadi saioan Biodonostia OIIaren Itziar Vergara, Lehen Mailako Arreta Taldeko talde-buruari, elkarrizketa.