Proiektuaren helburua da tresna diagnostiko eta terapeutiko berriak garatzea itsutasuna eragiten duten gaixotasun horietarako
Urtarrilaren 16an Biodonostian ospatu da Retina Euskadi Begisare elkarteak Osakidetzaren Biodonostia OIIri emandako 20.000 euroko txeke sinbolikoaren emate-ekimena. Diru kopuru hori erretinako distrofia hereditarioak ikertzen jarraitzeko erabiliko da.
Erretinaren distrofia hereditarioak ikusmen-anomaliak dituzten gaixotasun genetikoak dira, hala nola erretinosi pigmentarioa. Gaixotasun endekapenezkoak eta herentziazkoak dira, erretinari eragiten diotenak, eta ikusmena poliki-poliki galtzera eramaten dutenak, itsutasuna eragin arte. Gaur egun ia denak sendaezinak dira.
Retina Gipuzkoa Begisare elkartea duela 25 urte sortu zen eta, oraintsuago, Bizkaiko eta Arabako elkarteak sortu dira helburu berarekin: erretinako distrofia hereditarioek eragindako pertsonen bizi-kalitatea hobetzea, gizartea sentsibilizatzea eta gaixotasunak sendatzea lortzeko ikerketa bultzatzea. “Hainbat urte daramatzagu elkarrekin lanean, eta ahalegin berezia egiten hainbat kanpainen bidez dirua biltzeko. Kanpaina horiei esker, 255.000 euro eman ahal izan ditugu, Biodonostian erretinako distrofia hereditarioen ikerketa sustatzeko” diote elkartetik.
Biodonostia OIIko Neuroendekapen sentsorialeko Taldeak −Javier Ruiz doktorea buru− eta Donostia Ospitaleko Oftalmologia Zerbitzuak −Cristina Irigoyen doktorea buru− eta Retina Euskadi Begisare elkarteak elkarlanean diraute 2011az geroztik, begiko gaixotasun horien inguruan.
“Retina Euskadi Begisarek emandako finantzaketari esker, erretinako distrofia hereditarioak ikertzeko hainbat proiektutan aurrera egin ahal izango dugu. Alde batetik, estrategia terapeutiko bat garatzen ari gara, begi-bide topikotik ematen den eta distrofia horietako mota askori zuzenduta dagoen molekula bat erabiliz. Gainera, genomaren analisian oinarritutako diagnostiko estrategia berrien garapenean aurrera egingo dugu” adierazi dute taldeko ikertzaile arduradunek.
Ekitaldian Retina Euskadi Begisareren hiru lurraldeetako ordezkaritza bat izan da, Valentín Simón, Itsaso Nuin eta Arantza Uliarte Árabako, Gipuzkoako eta Bizkaiako presidenteak hurrenez hurren. Biodonostiaren aldetik, Itziar Vergara Zuzendari Zientifikoarekin batera Neuroendekapen Sentsorialeko ikerketa-taldearen ordezkaritza handi bat egon da: Javier Ruiz Ederra eta Cristina Irigoyen doktoreak, taldeko ko-liderrak, Araceli Lara López, María Rodríguez Hidalgo, Klaudia González Imaz eta Pablo Marco Moreno ikertzaileekin batera. Ainara Vallejo Illarramendi, Neurozientzien arloko ikertzaile nagusietako bateta proiektuaren kolaboratzailea ere bertan izan da.
Biodonostia eta Donostia Ospitaleko profesionalek adierazi dutenez, gaixotasun hori ezagutzen aurrera egiteko, ezinbestekoa da Retina Euskadi Begisare elkartearen parte-hartze aktiboa, pazienteen beren aldetik, baita beren senitarteko eta lagunen aldetik ere. Halaber, elkarteak eta ikertzaileek azpimarratu dute baliabideak lortzea funtsezkoa dela ikerketak aurrera egin ahal izateko.
