1.motako Distrofia Miotonikoa (DM1) gaixotasun hereditarioa da, jatorri muskularra du, baina multisistemikoa, kronikoa, eta, bere intzidentziagatik, gaixotasun arraroen taldean sartzen da. Gaur egun ez dago tratamendu eraginkorrik, gaixotasunari aurre egiteko.

Donostia Unibertsitate Ospitaleko Neurologia Zerbitzuko buru Adolfo López de Munain eta Biodonostia OIIko Onkologia Zelularreko taldeko buru Ander Matheu doktoreek koordinatutako ikerketak identifikatzen du 1. motako distrofia miotonikoa duten pazienteen zelulek metabolismo murriztua eta disfuntzio mitokondriala dutela. Bi fenomeno horiek zahartze fisiologikoarekin batera gertatzen dira, eta horrek iradokitzen du DM1 zelulek zahartze bizkorra jasaten dutela.

Ideia horren ondorioz, ikertzaileek aztertu zuten ea metformina konposatuak, zeinaren zahartzearen aurkako jarduera eredu aurreklinikoetan nabarmen frogatuta baitago, DM1 zeluletan behatutako zahartze goiztiarreko fenotipoak lehengoratu zitzakeen. Emaitzek aurreikuspenak berretsi zituzten, eta justifikazio aurrekliniko sendoa ematen dute, beste urrats bat emateko eta konposatu horrekin saiakuntza kliniko bat egitea proposatzeko.

“Myotonic Dystrophy type 1 cells display impaired metabolism and mitochondrial dysfunction that are reversed by metformin” izeneko lana Biodonostia Osasun Ikerketa Institutuaren eta Donostia Unibertsitate Ospitalearen arteko 5 urteko elkarlanaren emaitza da, eta bi erakundeen zahartzeari buruzko ikerketa-estrategiaren barruan kokatzen da, eta Eusko Jaurlaritzako Hezkuntza eta Osasun Sailen laguntzak jaso ditu.

 Erreferentzia: https://pubmed.ncbi.nlm.nih.gov/32310829/